پاکستان جگ دے انہاں کجھ ملکاں اچ رل گئے جتھاں کرونا تے قابو پاتا گئے،وڈی عید اتے محرم تے ودھ اھتیاط دی لوڑھ اے،خطرے دے باوجود سمارٹ لاک ڈاﺅن دا فیصلہ کیتا ہا جیڑھا اﷲ دے کرم نال کامیاب ثابت تھئے،وزیراعظم عمران خان دا کوروناسانگے جائزہ اجلاس نال خطاب

اسلام آباد ۔ 27 جولائی (اے پی پی)وزیراعظم عمران خان آکھیے جو پاکستان جگ دے انہاں کجھ ملکاں اچ رل گئے جتھاں کرونا تے قابو پاتا گئے،وڈی عید اتے محرم تے ودھ اھتیاط دی لوڑھ اے،خطرے دے باوجود سمارٹ لاک ڈاﺅن دا فیصلہ کیتا ہا جیڑھا اﷲ دے کرم نال کامیاب ثابت تھئے جیکر احتیاط نہ ورتی تاںکیسز ولا ودھ سگدن۔اے گالھ انہاں اسلام آباد اچ کورونادی صورتحال دا جائزہ گھنڑ کیتے تھیونڑ آلے اجلاس نال خطاب اچ آکھی۔اجلاس اچ وفاقی وزیر اطلاعات و نشریات سینیٹر شبلی فراز، وفاقی وزیر منصوبہ بندی، ترقی و اصلاحات اسد عمر، وفاقی وزیر صنعت و پیداوار حماد اظہر، وزیراعظم دے معاون خصوصی برائے صحت ڈاکٹر ظفر مرزا، وزیراعظم دے فوکل پرسن برائے کوویڈ 19 ڈاکٹر فیصل سلطان اتے وزیراعظم دی معاون خصوصی برائے سماجی بہبود و تخفیف غربت ڈاکٹر ثانیہ نشتروی موجودہن۔ وزیراعظم آکھیا جو ملک اچ اﷲ دے فضل و کرم نال کورونا دے کیسز تے اموات دی شرح اچ کمی آگئی اے،کل ترائے مہینے اچ سب توں گھٹ کیسزدی شرح ریکارڈکیتی گئی اے۔ہسپتالاں اچ مریضاں،انتہائی نگہداشت اتے آکسیجن بیڈز دے دباو، اچ وی کمی آئی اے، اﷲ تعالیٰ دا خاص کرم اے جو پاکستان تیکھے کرونا تے قابو پا گھدے،بھل حالی چیلنجز مکیے نئیں، ساکوں احتیاط ورتنڑی ہوسی تاں جو کیسز بیا نہ ودھ ونجن نتاں مسلے وی ودھ ویسن۔وزیراعظم آکھیا جو ساڈے تے یورپ جھیںا قدامات دا دباو ہا بھل اساں بنھاں توں مختلف حالات پاروںنویکلی حکمت عملی اختیار کیتی کیوں جوسادے کولو غربت،انفارمل لیبر، کچی آبادیاں جھیں مسائل ہن،اساں صلاح مشورے توں بعد سمارٹ لاک ڈاﺅن دی پالیسی تے عمل کیتے جیندے نال ڈیھاڑی دار، چھابڑی فروش، رکشہ ڈرائیور اتے محنت کش طبقے کوںس وکھ ملیے،اج جگ وی منیندامکمل لاک ڈاﺅن نا ممکن اے۔وزیراعظم آکھیا جو اساں بہوں تنقید اتے خطرے دے باوجود ایں اوکھے ویلھے اساں اوکھے فیصلے کیتن جیندے اچ سرخرو رہے ہیں اتے اللہ کامیابی ڈتی اے،اساں کرونا تے قابو پاونڑ دے نال نال اپنڑے لوکاں کوں بکھ توں بچاونڑ اتے معیشت کوں ٹوری رکھنڑاچکامیاب تھئے ہیں،پاکستان اچ احساس پروگرام دی کامیابی دی جگ دی تاریخ اچ کتھائیں مثال نئیں ملدی جو اتنے گھٹ ویلھے اچ وڈے شفاف طریقے نال لوکاں کوں اتنا پیسہ پچایا گئے اتے کمزور طبقہ معاشی مسلیاں توں بچ گئے۔وزیراعظم آکھیے جو اساں محرم اتے وڈی عید تے وی ودھ احتیاط ورتنڑی اے،نتاں مسلے ودھسن اتے معیشت خراب تھیسی،جیکر اساںاحتیاط کیتی تاں ریستوران، سروس سیکٹر، شادی ہال اتے سیاحت سودھے بئے شعبیاں کوں وی کھولیا ویسی،ایں سانگے علما دا وڈا کردار اے جو احتیاطی تدابیر کیتے خیال رکھین،جیکر صورتحال قابو اچ رہی تاں ول ایس او پیز نال تعلیمی ادارے وی کھولیے ونج سگدن۔ ۔وزیر اعظم آکھیا جو حکومت تعمیرات دے شعبے کیتے بہوں وڈاپروگرام گھدی آندی اے۔