پاکستان اقلیتاں دے نال ناروا سلوک متعلق بھارتی پروپیگنڈا مسترد کر ڈتا

سکھ نینگر دے قتل دے افسوسناک واقعے تے سیاست کرنڑ دی مذموم بھارتی کوشش شرانگیز اتے قابل مذمت اے
بابری مسیت دی شہادت، گجرات اچ ہزاراں مسلماناں دا قتل عام ، جنونی جتھے دے ذریعے لوکاں دی ہلاکت اتے اقلیت دے خلاف نفرت تے مبنی واقعات نال بی جے پی حکومت دا خونی چہرہ پوری دنیا دے سامنڑے آگے، دفتر خارجہ
اسلام آباد ۔ 6 جنوری (اے پی پی) پاکستان اقلیت نال ناروا سلوک متعلق بھارتی پروپیگنڈا مسترد کریندے ہوئیں آکھیے جو ننکانہ صاحب اتے پشاور اچ امن عامہ متعلق انفرادی نوعیت دے واقعات کوں بی جے پی حکومت دا اقلیت نال بدسلوکی دے شرانگیزپراپیگنڈے نال تعبیر کرنڑ پاکستان دے خلاف بھارت دی کردار کشی دی روایتی مہم دا حصہ اے جیں دا مقصد بھارت دے زیر قبضہ جموں وکشمیر اچ جاری ریاستی دہشت گردی اتے بھارت دے اندر اقلیتوں دے خلاف تھیونڑ آلے منظم متعصبانہ اقدامات توں دنیا دی توجہ ہٹاونڑ اے ،سنوار کوں دفتر خارجہ توں جاری بیان اچ آکھیا گے جو پاکستان ایں بھارتی پراپگنڈے اتے بے بنیاد الزام کوں قطعی مسترد کریندے۔ ایہو سویں الزام نال پراپیگنڈے نال بی جے پی حکومت بھارت دے زیر قبضہ جموں کشمیر اچ اپنڑے غیر قانونی اقدامات ، امتیازی شہریت ترمیمی ایکٹ اتے شہریاں دے اندراج (این آر سی) جیہوجے متعصبانہ قانون دے ردعمل اچ پیدا تھیونڑ آلی صورت حال کوں لکا نی سگدا ۔ پاکستان سکھ مذہب سمیت سارے مذہبی جہیں تے اقلیت دیاں عبادت گاہیں کوں احترام ڈیندے ۔ بیان اچ آکھیا گے جو اساں گردوارہ ننکانہ صاحب دی مقدس جاہ تے ”حملہ“ اتے ”بے حرمتی“ متعلق سارے بھارتی الزامات کوںسختی نال مسترد کریندوں ۔اے چٹا کوڑ ’آر ایس ایس‘ تے ’بی جے پی‘ دی بدنام زمانہ پراپگنڈہ مہم دا حصہ ہن جیں اچ ہمیشہ وانگوں ایں واری وی ناکامی تھیسی۔ پوری دنیا اچ آباد سکھ برادری کوں ایں حقیقت دا پتہ اے جو وزیراعظم عمران خان دی حکومت اقلیت تے انہاں دیاں مذہبی جہیں کوں کیویں اہمیت ڈتی ۔ تاریخی کرتارپور راہداری دا 9 نومبر2019ءکوں افتتاح وزیراعظم دی ایں ضمن اچ سوچ دا واضح اظہار اے۔سکھ نینگر دے قتل دے افسوسناک واقعے تے بھارتی سیاست کرنڑ دی مذموم کوشش کریندا پئے جیرھا جو شرانگیز اتے قابل مذمت اے۔ جیویں ہی قتل دا اے واقعہ سامنڑے آئے وختی مقدمہ درج تھئے تے اعلیٰ سطح تحقیقاتی کمیٹی بنڑائی گئی اے ،قانونی کاروائی دے نتیجے اچ ملوث عناصر کوں قانون دے مطابق سزا ڈتی ویسی ۔ پاکستان ہندو، سکھ اتے مسیحیاں سمیت مختلف دین دے منڑ آلیں دا ملک اے جیرھے جو اتھاں رل مل تے رہندن ، پاکستان دا دستور ساریں کوں برابر دے حقوق ڈیندے تے حکومت کہیں وی قسم دے امتیاز نال سختی نال نبڑنڑ اپنڑاں فرض سمجھدی اے ۔